By Thattinlien Sungte
Vawisun chu ram tuon zai khawm hi rel chuong lovin,
Runin sun gah tappuon khawng zai ka rel;
Pheivawn le kawlseke, tliem le tukdet, tinbu,
Taizel le tanhna kim, kawl famkim in,
Ka khawnga a, zie te chu tiel ditdit,
Rawng chi tin rengin ka chei,
Par ze tinrengin ka cheimawi a,
Nemrang ka kawng.
Sawngtelaivel, lenbuongthuom, kikieu, thalpui zie,
Kawkpuizikziel le disul, fanghma mu;
Dawichang, muthlakawi, harzai, siellutum hmaizap,
Amkar le zawngdaikal, rawng chi tinrengin.
Thangtharin zei thar an tih, thiem dan thar a tih,
Zawra bang le vuongna zei, vankawtthler;
Motor ke, India Flag, Bethlehem par note zei,
Par zei le arasi, rawng chi tinrengin.
Sei ka khawng zo, nemrang puonlaisen, ngotekher,
Bawta puon le tui bo puon, thangsuo puon;
Dawi puon le lungum puon, Hmaram le khiengkawi puon,
Nghotlawng le Hmar Puon hai, rawng chi tin hmangin.
