By Lalthlamuong Keivom
Thlang vaipui le sappui el lo,
Sinlung par mawi kung chu;
In thuruolna, tlawmngaina hlu,
Sinlung par mawi kung I lo nih.
Inthuruolna tlawmngaina hlu,
Sinlung ropuina par mawi;
Par ang vul zing rawh kan tawnah,
Hmar tlanpui par mawi kung di’n.
I sakhmel enin suilung a dam,
Lunghnem par I lo nih;
Suotlang mawi le runin mawitu,
Aw tlawmngaina nang ngei hi.
Nun mawi, dan tha, remna thuthlung,
I zar kung an lo nih;
Basam mawitu tawnlairang par,
I mawina zungzam an lo nih.
Thangthar nunphung tui ang dangin,
Puon ang hnawl sien che khawm;
Kan ram, kan hnam chawisangtu di’n,
Aw tlawmngaina hlu vul zing rawh.
