By Lalthlamuong Keivom
Thing tin sawl an vulna ram inhawi,
Par mawi tinreng an vulna ram chu;
Aw hmar tlang nang ngei hi I lo nih,
Par tinreng vulna ram chu.
Hieng anga ram inhawi le mawi hi,
Hringmi khawvelah um veng a tim?
A um nawh, hieng anga ram inhawi,
Hringmi khawvelah hin chu.
Romei le lentupui kai velna’
Sirva lungruol zai tin an vawmna;
Nghaknu, Val, Sirva ang lenruol kim,
Hlim zai an vawma ram chu.
Virthli hrang deldelna ram inhawi,
Zotui thieng luong deldelna ram chu;
Sawmfang lentu par ang an vulna,
Hmar tlang ngei hi I lo nih.
I sakhming chawi hi a mawi renga,
Sak le thlang, sim le hmar ram tinah;
I mawina par rimtui luong vel chu,
Ruolthar ha’n par ang kan tlan.
Chung pathien malsawmna hlu tak chun,
Vur zing sien, hraichawi rieng nau lawmna’n
Suilung ruola lengna hmar tlang hi,
Lalpan malsawm zing raw se.
